1992 йил 2 июлда Ўзбекистон Республикасининг Биринчи Президенти Ислом Каримов “Ўзбекистон Республикаси Давлат герби тўғрисида”ги қонунини имзолади. Шу боис, мустақилликнинг илк йиллариданоқ 2 июль – Ўзбекистон аҳли учун давлат мустақиллигининг рамзларидан бири сифатида қадрли ва унутилмас кунлардан бири бўлиб қолди.

Бугун ушбу муқаддас рамзни каттаю кичик бирдек қадрлайди. Унда жонажон Ўзбекистонимизнинг том маънодаги асл тасвирини кўради. Гербимизга ҳар бир ҳамюртимиз алоҳида эҳтиром билан муносабатда бўлиши мамлакатимизда эзгу қадриятга айланган.

Ўзбекистон Республикасининг давлат рамзлари – байроқ ва герб муаллифи, Ўзбекистон халқ рассоми Анвар Мамажоновнинг эслашича, 1991 йили мамлакат мустақилликка эришгач, Ўзбекистон давлат байроғи ва гербини яратиш бўйича танлов эълон қилинган. Унда бутун республика бўйлаб ижодкорлар ва кўнгиллилар иштирок этишган. Танловга тақдим этилган эскизлар Фанлар академиясининг профессор-ўқитувчилари ва рассомлардан иборат комиссия томонидан ажратиб олинган.

Танлов сўнгида Анвар Мамажонов варианти финалга ўтгани ҳақида хабар берилган. Мусаввирнинг эслашига кўра, гербнинг марказига дастлаб афсонавий Семурғ қуши чизилган, Ислом Каримовнинг таклифига асосан уни Ҳумо қушига ўзгартирган.

“Давлат раҳбари бутун иш жараёнини кузатиб, ҳаммасини назорат қиларди. У гербда йиртқич ҳайвонлар бўлмаслиги кераклигини айтиб ўтганидан сўнг, ғоялар мутлақо ўзгарди, жумладан, менинг эскизларим ҳам бошқача кўринишга эга бўлди. Бундан ташқари, Биринчи Президент, Ҳумо – бахт, эркинлик қуши, унинг боши эгилган ҳолатда бўлиши керак эмас, деганидан сўнг тасвирни ўзгартирдик”, – дейди А.Мамажонов.

Мамлакатимизда истиқомат қилаётган ҳар бир фуқаро давлат рамзлари, шу жумладан, Ўзбекистон Республикасининг Давлат гербига ҳурмат билан муносабатда бўлиши қонунчилик билан белгилаб қўйилган. Давлат рамзларига бўлган ҳурмат мурғаклигидаёқ ёш авлод онгига сингдирилади. Бу эса улғайиб келаётган ўғил-қизларда ўзи туғилиб ўсган юрт тақдири учун дахлдорлик, ватанпарварлик, фидойилик, Ватан учун чексиз фахр ва ифтихор туйғуларини мустаҳкамлашда муҳим омил бўлиб хизмат қилади.

Бугун дунёда Янги Ўзбекистон номи билан олиб борилаётган ислоҳотлар, ўзгаришлар – юртимиз давлат гербидаги эзгулик ҳамда улуғворликка уйғун ва ҳамоҳанг экани билан аҳамиятлидир.

Ф.Қурбонбоев ва Т.Қурбонбоев фотолари