Islom Karimov nomidagi ilmiy-ma’rifiy yodgorlik majmuasiga – mamlakatimiz Birinchi Prezidentini xotirlab, Koreya Respublikasining O‘zbekiston Respublikasidagi sobiq Favqulodda va muxtor elchisi Che Yong Xa tashrif buyurdi.

Ma’lumot o‘rnida aytib o‘tish lozimki, Che Yong Xa 1997–2000 yillarda elchi sifatida faoliyat olib borib, O‘zbekiston hamda Janubiy Koreya o‘rtasidagi o‘zaro hamkorlik munosabatlari rivojiga salmoqli hissa qo‘shgan. Uning mazkur faoliyati munosib baholanib, 2000 yilda O‘zbekiston Respublikasi Birinchi Prezidenti Islom Karimov Farmoni bilan, mamlakatimizning yuksak mukofotlaridan biri – “Do‘stlik” ordeni bilan taqdirlangan.

Diplomat Yodgorlik majmuasining Ko‘rgazmalar zalida O‘zbekiston Respublikasining Birinchi Prezidenti Islom Karimov faoliyatiga oid kartinalar, portretlar, fotolar, peyzaj va haykaltaroshlik namunalari bilan tanishib, bu maskandagi san’at asarlariga yuksak baho berdi.

Mehmon O‘zbekistonda ishlagan yillari to‘g‘risidagi eng yorqin xotiralari bilan o‘rtoqlashdi va faxriy mehmonlar kitobiga o‘z taasurotlarini bitib, dastxat qoldirdi.