ISLOM KARIMOV ILMIY-MA’RIFIY MAJMUASI

Oydin Hojiyeva, O‘zbekiston xalq shoiri


ODDIYLIKDAGI BUYUKLIK

2000 yil avgusti. Namxush kuz tongi. Shahidlar xotirasi maydonida yer-ko‘kka odam yog‘ilgan. Saharlab osmonda qora bulut to‘planib maydon tepasida burgutdek bir aylandi-da keng samoning bag‘rida kalavaday chuvalib so‘ng tarqab ketdi. Ruhlar junbushga keldi, dedi yonimdagi onaxonlardan biri. Maydon o‘rtasida o‘rnatilgan marmartosh salobatli ko‘rinadi.

Maydonning past tomonidagi ko‘priklardan turanaqator bo‘lib tumonot odam xotira yodgorligi girdiga to‘plandilar.

Birinchi Prezidentimiz Islom Karimov yonlarida Mutavakkil Burxonov va ikki kishi hamrohligida Yodgorlik sahniga chiqishdi. Yurtboshimizning bir qadar mahzun, bir qadar otashin nutqi yuraklarga hayajon soldi. Bir payt ayollar orasidan baland bo‘yli qora mag‘izdan kelgan ayol zinadan ko‘tarila boshladi. Uning jur’atidan biroz bezovtalanib shahar xotin-qizlar sarvari Farida Abdurahimova ayol tomon kela boshlaganida sezgir Yurtboshimiz tabassum bilan zinadan tushib ayol peshvoziga tushdilar va uning yelkalariga qo‘llarini qo‘yib zinadan ko‘tarilib sahnaga olib chiqdilar.

U sipolik bilan ohista so‘z boshladi:

Buvim Josiyat bibi kechalari otamni yo‘qlab “bemozorim” deb yig‘lardilar. Otamizning xokini quchib tavof qiladigan qabri yo‘q edi. Allohga shukur, mana endi padarimiz qabrini ziyorat qilib yig‘laydigan, gul qo‘yadigan ziyoratgoh barpo etildi. Mana bundan buyon Abdulla Qodiriyning farzandlari, nabiralari tavof qiladigan sajdagoh yaratildi. Minglab shahidlar, qatag‘on qurbonlari sharafiga ehtirom ramzidir bu. Ajdodlar va avlodlar nomidan yurtimizning dono farzandiga rahmatlar aytaman...

Maydon larzaga keldi. Bu mushfiq ayol buyuk Qodiriyning qizi Anisa Abdullayeva edi.

O‘shanda Islom Karimovning xalqimizning buyuk tarixiga, unutilmas siymolariga mehrini va oddiy insonlarga e’tiborini, samimiyatini ko‘rib hayratga tushganman.

Qancha bezovta ruhlarning armonlarini hayqirig‘iga singdirgan Bo‘zsuv va qancha kafansiz ko‘milganlarning faryodidan titrab yotgan jarliklar ozgina taskin topganday. Bu maydonda ”Shahidlar xotirasi” moziyxonasi tashkil etildi. Qirchinida o‘qqa uchgan yurt o‘g‘lonlarining aziz siymolari, egasiga yetmagan nomalari, ohlari bitilgan daftarlar bunda keluvchilarni tarixning iztirobli sirlaridan ogoh etadi, insonni ulug‘lashga, xalq xotirasini qadrlashga da’vat etadi. Bugungi farovon ma’mur, tinch osoyishta kunlarimiz uchun ne-ne aziz insonlar kundaga bosh qo‘yganidan xabardor qiladi yosh nasllarni.

Ana shunday savobli xayrli ishlarning boshida turgan Birinchi Prezidentimiz Islom Karimov buyuklik cho‘qqisida nur sochib turadi . Bu nur yuraklarimizda, xotiramizda abadiy porlab turajak.

 

                                                                                                                                   ONA TURKISTONCHA YIG‘LAGAN YO‘QDIR

– Istiqlol havosiga, ozodlikka, erkinlikka to‘yish mumkinmi o‘zi?

O‘zbekiston Respublikasining Birinchi Prezidenti I.KARIMOV so‘zlaridan.

 

                                                                                                                                        Kiyikning ko‘zidan boshqa aybi yo‘q,

                                                                                                                                        Manim jayron elim, ko‘zlaringda o‘q.

                                                                                                                                        Darding-ku ko‘ksingda yonib turgan cho‘g‘,

                                                                                                                                        Ozodlik deb sen-cha yig‘lagan kimdir?

                                                                                                                                         

                                                                                                                                        Oyoq ostindagi tufroq bo‘lding-a,

                                                                                                                                        «Bosmachi» bo‘lding-a, «quloq»bo‘lding-a,

                                                                                                                                        Qirg‘inlarda boshi uloq bo‘lding-a?

                                                                                                                                        Erk deb sen-cha bag‘rin tig‘lagan kimdir?

 

                                                                                                                                        O‘zligingni qamab «Yoriltosh»larga,

                                                                                                                                        Aylanding qanoat, fil bardoshlarga,

                                                                                                                                        Hasratingni aytib gulga, toshlarga,

                                                                                                                                        Jigari-bag‘rini dog‘lagan kimdir?

                                                                                                                                         

                                                                                                                                        Kafansiz ko‘milgan, mozori g‘orat,

                                                                                                                                        Yig‘lab-yig‘lolmagan, ozori g‘orat,

                                                                                                                                        Umr degan savdo bozori g‘orat,

                                                                                                                                        Selu sebor bo‘lib yig‘lagan kimdir?

                                                                                                                                         

                                                                                                                                        O‘z uyidan nogoh chiqqanda ilon,

                                                                                                                                        Beklari tirqirab to‘zg‘isa to‘rt yon,

                                                                                                                                        Ojiz qo‘ychivondek garangsib yomon,

                                                                                                                                        Yetmish yil o‘likday uxlagan kimdir?

                                                                                                                                         

                                                                                                                                        Qandaladay so‘rib kuch-madorini,

                                                                                                                                        Bir yuho toptadi nomus-orini,

                                                                                                                                        Unutib Allohday aziz yorini,

                                                                                                                                        Uzlatda senchalik yig‘lagan kimdir?

                                                                                                                                         

                                                                                                                                        Xarsanglar mum bo‘ldi Qadr kechangda,

                                                                                                                                        Ilohiy zum bo‘ldi Qadr kechangda,

                                                                                                                                        Kim bildi, kim bildi Qadr kechangda:

                                                                                                                                        Non emas, nur so‘rab yig‘lagan kimdir?

                                                                                                                                         

                                                                                                                                        Ruhingdagi mayin shabbodalardan,

                                                                                                                                        Ko‘zingdagi ozod ifodalardan,

                                                                                                                                        G‘oyibu tirik bor g‘ambodalardan

                                                                                                                                        So‘ylasam, senchalik yig‘lagan kimdir?

                                                                                                                                         

                                                                                                                                        Qodiriyning mahzun ko‘zlari aytsin,

                                                                                                                                        Nosiriyning pari so‘zlari aytsin,

                                                                                                                                        Ajdodlarning ulug‘ qarzlari aytsin:

                                                                                                                                        Ona Turkiston-cha yig‘lagan yo‘qdir,

                                                                                                                                        Ozodlik deb oncha yig‘lagan – yo‘qdir

                                                                                                                                                                                                                            1993.